алтын
1. Сары түсті жарқыраған әдемі қымбат металл. Алтын өндірді. 2. Осы металдан жасалған. Алтын жүзік (сағат, тіс). 3. ауыс. Қадірлі, қасиетті. Жоғалған пышақтың сабы алтын (Мақал). 4. ауыс. Бағалы, қымбат. алтын сөз (дән, астық). 5. поэт. Сұлулық пен әдемілік бейнесі. Алтын күз (арай, таң, әріп). Алтын алқа – алтыннан жасалған алқа. Алтын балық – аспанның оңтүстік жарты шарындағы шоқжұлдыз. Алтын жақты айбалта (көне) – екі жағына алтын жалатқан кішірек балта. Алтын жамбы (көне) – мергендік сынасатын ойын. Алтын жұлдыз – көрсеткен ерлігі үшін берілетін ең жоғарғы награда. Алтын кітап – еңбек озаттарын тіркеп көрсететін құрмет кітабы. Алтын қабақ – садақ тартқыш жігіттердің бәсеке сайысы. Алтын қазық – мықты тірек. Алтын қазына [қор] – жиған-терген байлық, рухани игілік. Алтын қоры – эмиссиялық банкілер мен казначейліктердің алтын құйма және алтын шақа түріндегі қоры. Алтын медаль – орта мектепті үздік бітіргендерге және спортта айрықша артық ұпай алғандарға берілетін медаль. Алтын орда – 13 ғ. Қазақстан, Орта Азия, Шығыс Европа жерлерінде құрылған мемлекет. Алтын тақ – патша отыратын алтыннан жасалған орындық. Алтын той – отасқанына елу жыл толған ерлі-зайыптыларды тойлау салты. Алтын айдар, жібек шашты [шоқ белбеу] – қисса-дастандардағы сұлулық бейнесі. Алтын асықтай – әдемі, сүйкімді. Алтын бесік [босаға, ұя] – туған, өскен орта, шыққан жер. Алтын жаға сөгілді – береке-бірліктен айрылды. Алтынмен аптап, күміспен күптеді – құлпыртып, безендіріп қойған. Алтынның сынығы – жақсының көзі