кісі
1. Адам, пенде, жан. От басында үш кісі отыр (Сланов). 2. ауыс. Бөтен біреу, бөгде адам. Үйленгенше өз ұлың, үйленгенсін кісі ұлы (Мақал). 3. ауыс. Қонақ, мейман. Үйге кісі келмек. Кісі (жұрт) аяғы басылды – а) адамдардың жүріс-тұрысы азайып, тынышталды; ә) беймезгіл уақыт болды, кешкірді. Кісі бетіне қарамады – ұялды, қысылып-қымтырылды. Кісі бойы – биіктік, ұзындық, тереңдікті білдіретін халықтық өлшем. Кісі болар бала – келешегінен үміт күттірер жеткеншек. Кісі босағасы (үйі) – бөтен адамның үйі, біреудің есігі. Кісідегінің кілті аспанда – біреуге ісі түскеннің қиындығы көп. Кісі есігінде жүрді (өтті) – жалшылықта жүрді. Кісі жұтып қойғандай – сүйкімді, келісті. Кісі қолына қарады – өз бетімен күн көре алмады. Кісі құрлы (ғұрым) көрмеді – адам орнына санамады, менсінбеді. Кісі қызығарлық – назар аударарлық. Кісі салды – араға елші жұмсады. Кісі санатына кірді – адам қатарына қосылды. Кісі сыртынан тон пішті – біреу жайында өзінше пікір айтты, мінеді. Кісі тіліне ерді – біреудің сөзіне сенді, жетегінде кетті. Кісі шақырды – а) басқа жақтан кісі келтірді; ә) қонақ шақырды