отау
IЕгінді арам шөптен тазарту, шөптеу. Ол киіздей боп қаулаған арам шөбін отады (Хасенов). 2. Қырып жою, жоқ қылу, құрту. Әскер торын кең жайып, Амантай отрядын отап қиратты (С.Мұқанов)
II
Жаңадан тұрмыс құрып, енші алып бөлінген ұлдың үйі; отау үй. Ағайым отау болып, енші алып кетті (Аймауытов). Отау иесі – жеке шаңырақ иесі, кіші үйдің иесі. Отау жабар [көне] – ұзатылатын қалыңдықтың отауын тіккенде әйелдердің күйеу шешесінен алатын кәдесі. Отау құтты болсын! – баласына енші беріп, бөлек үй тұрғызғанда айтылатын тілек. Отау шаруа – кіші-гірім, болар-болмас, азын-аулақты шаруа
III
спорт. Тоғызқұмалақ тақтасындағы құмалақтар орналасқан 9 ұяның жалпы атауы. Әрбір ойынның тоғыз-тоғыздан отауы болады ("Спорт")
IV
жерг. Біраз шөмеленің жиынтығы. Үш жігіт жоян отау шөпті трактордың шанасына әп-сәтте тиеп алды (Бөкеев)