қабырға
I1. Омыртқа мен төс сүйекті ұштастырып тұратын имектеу келген жіңішке сүйек. Қара қабырға, сүбе қабырға. 2. ауыс. Жан-жануарлар қабырғасының екі жақ қапталы. Таяқ оң қабырғаның үстінен тиіпті. 3. ауыс. Бір нәрсенің оң не сол жақ қанаты. Жеке атқыштар мына қабырғадан ұратын болсын (Көшекбаев). Қабырға ағайын – алыстау, жанама туыс. Қабырғадан қан кешті – қырғын соғысқа тап болды. Қабырғаңмен кеңес [ақылдас] – ақылға сал, ойлан. Қабырғасы жабық – семіз, қоңды (мал). Қабырғасы қайысты – қатты қайғырды, уайымдады. Қабырғасы қатпаған [қатаймаған] – ер жетпеген, әлі жас. Қабырғасы қатып, бұғанасы бекіді – кемел жасқа толды, келді. Қабырғасына [аяздай] батты – ауыр соқты, қиын тиді. Қабырғасына қол батпайды – семіз, жұнттай. Қабырғасын жапты – жыртығын бүтіндеді, кемін толтырды. Қабырғасын қаусатты [күйретті] – ауыр тиді, жанға батты. Қабырғасы сөгілді [қақырады] – қабырғасы қайысты, жаны ашыды
II
1. Үйдің, қораның т. б. құрылыстың тік келген төрт жақтауы. Ол қабырғаға сүйене кетті. 2. Геометриялық фигуралардың жақтаушары. Тік бұрышты үшбұрыштың қабырғалары. Қабырға газеті – белгілі бір ұйымның я ұжымның өздері шығарып тұратын газеті. Қабырға сағаты – қабырғаға іліп қоятын үлкен сағат. Қабырғасын көтерді – белгілі бір құрылыстың негізгі қаңқасын қалап бітірді