қазан
I1. Тамақ пісіруге арналған үлкен шойын ыдыс. Қазан толы ет. 2. метал. Кен қорытатын үлкен шойын ыдыс; багранка. Бұл қазан сағатына 40 тонна шойын қорытады. 3. кәс. Судың балық көп жүретін, қыста қатпайтын, терең жері. Әдетте қазанға балықтар үйір келеді. Қазан асты – тамақ жасады, ет салды. Қазан бас – басы қазандай үлкен (кісі). Қазан көтерді – тамақ әзірлеуге кірісті, қазан асты. Қазан құйрық – құйрығы қазандай, үлкен (қой). Қазаны басқа – өз алдына бөлек үй, жеке отбасы. Қазаны майланды – қазанына семіз ет асты. Қазаны оттан түспейді – бір тамақтан кейін бір тамақ пісіріп үнемі ас әзірлейді. Қазан аузынан бөлісті [бөліп ішті] – бар тапқанын ортаға салды. Қазан бұзарлық – содырлық, сотқарлық, тентектік. Қазан құлағын [тұтқасын] ұстады – билікке қолы жетті. Қазанның түп күйесіндей – қап-қара, тіптен қара. Қазан үстінен күн көрді – біреудің еңбегі есебінен күнелтті
II
Күздің екінші айы; октябрь. Қазан соқты – аяз ұрды, суық шалды. Қазан ұрды – қазанның қара суығы ұрып, көк біткенді солдырды. Қазан болды – бақшадағы қауын-қарбыз таусылды, бітті
III
көне. Өзгеше, басқаша, ақыр соңы, тәмам. "Елу жылда ел жаңа, жүз жылда - қазан ". (Мақал)