алтыбақан
зат. көне Қазақтың ұлттық ойыны. Алтыбақанды сырықтың екі басына үш-үштен қосақтап (мосы ағашы сияқтандырып) байлайды. Бақанның аша тармағы сырыққа кигізіліп тұруы тиіс. Алты бақанды құрастырып болғаннан кейін, оның екі басынан үш қатар арқан байлайды. Арқанның екеуі бір деңгейден 40—50 см төмен тұрады. Бір деңгейде байланған 2 арқанға 2 адам қарама-қарсы отырады да, төменірек байланған арқанға аяқтарын тірейді. Бұларды бір адам тербетеді. Алтыбақанда тербеліп отырған екі адам қосылып ән салуға тиіс. Алты бақан ертедегі ауыл өмірінде жастардың бас қосып, халық аспаптарының сүйемелдеуімен ән салатын, айтысатын, әзіл-оспақ, назды күлкісімен көпшілік болып көңіл көтеретін ойын-сауығы болған. Алтыбақанның дене шынықтыруға да пайдасы мол.