аударыспақ
зат. Қазақ, қырғыздың ұлттық спорт ойыны. Бүл ойында екі жігіт жекпе-жек шығып, бір-бірін аттан аударып түсіруге тырысады. Аттан аударып түсірген жігіт жеңеді. Үлкен той мен аста аударыспаққа арнайы жүлде белгіленеді. Осы жүлдені алу үшін әр ру, ауылдың адамдары тегеуірінді жігіттерін мықты атқа мінгізіп, сайысқа шығарады. Сайыскерлердің қолына қару берілмейді. Олар тек білегіне, атына ғана сенеді. Атына ер-тұрманы сай, қайратты да әдісқой жігіттер қарсыласын ат үстінен аударып тастап, жүлде алады. Қазір аударыспақ ат спортының бір түріне айналған. Аударыспақ сайыскерлерден күштілікті, шапшаңдықты, тайсалмас батылдықты талап ететін болғандықтан, оған жасы 18-ден асқан жігіттер ғана қатысады. Ереже бойынша, аударыспаққа қатысушылар салмақтарына қарай үш топқа бөлінеді.