белдемше
зат.1. Әйелдердің сәнді киімі. XIX ғасырдың аяғына дейін әйелдер көйлек сыртынан юбка тәріздендіріп ойын-той кезінде киген. Белдемшенің бұл түрі өте сирек кездеседі. Белдемшенің алдыңғы өңірлері бір-біріне тиісіп тұрады да, белінен төмен қарай кеңи береді. Белдемше барқыт, түрлі-түсті жібектерден жиегі айнала оқамен, кестемен көмкеріледі немесе оған құндыз терісі жапсырылып, түрлі әшекейлермен безендіріледі, белі түймеленеді. Белдемше көйлектің етегін түгел жаппайтындай етіп тігіледі.
2. Үй шаруасына араласатын әйелдердің алдына байлайтын алжапқышы. Кей жерлерде мұны «алшалғыш» деп те атайды, жалаң қабат, қалың ақ не қоңыр тыстық матадан, кейде түрлі-түсті шыттан тігіледі. Мал сауғанда, тамақ даярлағанда тазалық үшін пайдаланылады.