бие
зат. Жылқы малының құлындайтын аналығы. Айғырдан ерте шыққан тай-байтал дұрыс өсе алмайды, кейде тіпті өсу мүлде тоқталады, өйткені қоректік заттардың көпшілігі құрсақтағы құлынның өсуіне кетеді. Бие белгілі кезеңде ғана айғырды жақындатады. Көбінесе күйіті 6—7 тәулікке созылады. Кей биенің күйіті 24—36 сағатта аяқталады, бұл әр жылқының ерекшелігіне байланысты. Бие орта есеппен 335 күнде (11 ай) құлындайды.
Құлындауына 2 ай қалғанда, құлындаған соң 15 күнге дейін бие жұмысқа пайдаланылмайды. Құлын тастамас үшін шіріген жем, өте суық су беруге, қараңғы қораға қамауға болмайды. Қора кең, жарық, таза болу керек. Құлындаған биенің алғашқы айдағы сүттілігі оның буаз кезіндегі күтіміне байланысты. Сондықтан буаз биенің қоңын кемітпеу керек. Ең жақсы азық —бұршақ және астық тұқымдас өсімдіктердің пішені мен бидайдың ірі кебегі. Әсіресе, беде мен жоңышқада ақуыз бен минералдық заттары көп; бұл бие организміне өте қажетті қорек. Алайда азықтың бір түрін екіншісімен бірден алмастыруға болмайды, буаз биені күн қызбай өріске ерте шығармайды, өйткені мұздық шөпті жеп, құлын тастауы мүмкін. Әдетте буаз биені өріске айдаудан бұрын оларға пішен не жем береді.