бие байлау
Қымыз ашыту үшін желіге құлынды байлап, бие сауу. Биені іріктегенде алдымен тұқымына көңіл бөлу керек. Мысалы, таза тұқымды мініс жылқысы мен ахал-теке биенің сүті аз, буденный жылқысы мен қазақы жылқының будан биелерінің сүті көп (тәулігіне 15—20 л) болады. Биенің желіні жақсы жетіліп, тамырлары білеуленіп тұрса бұл оның сүттілігін көрсетеді. Қолға үйретілген биенің мінезін, сүтін сарқа беретін-бермейтінін, құлынсыз иетін-имейтінін білу оңай. Сауын биелеріне оты жақсы өріс белгіленеді. Алайда биені күнінен 4—6 рет сауатындықтан, олар жақын өріске бағылады. Кешкі сауымнан кейін құлынды ағытып жібереді. Мұны «бие ағыту» деп те атайды. Құлын енесімен түні бойы бірге болады да, күндізгі сағат 9—11де желіге қайта байланады. Қазақ бие байлау мерзімін —биебау деп атайды.