дастархан
ир. зат. Ас ішкенде тағамның тазалығы және жинақтылығы үшін жерге немесе үстел үстіне төсеуге лайықталған жайма. Көбіне жібі жуандау қалың матадан не клеенкадан жасалады. Дастарқан атауы о баста парсы тілінен енген. Парсыша «дастар» сөзі орамал, сулық мағынасында қолданылады. Қазақстанның кейбір жерлерінде айтылатын «дәс орамал» (қол орамал) осы сөзбен төркіндес. Енді бір жерлерде дастарқанды «ас жаулық» деп те атайды. Дастарқанның семьяға арналған шағын және қонаққа, той-томалаққа арналған молдау түрлері, шайға, етке лайықтылары да болады. Ұн елегенде, нан жайғанда пайдаланатын түрін «сыпыра» деп атайды. Оны бұрын жұқа теріден жасайтын болған. Дастарқан атауы — береке, ризық, дәулет, молшылық деген сөздердің баламасы ретінде де қолданылады. Қазақтың біреуге «Дастарханың мол болсын» деуі оның үй-ішінің молшылықта тұруына, дәулетті болуына тілектестік білдіргені.