еттік
зат. Сойылған малдың, соғымның етін сақтайтын салқын үй, етхана, кілет. Көбінесе тастан, кірпіштен яки шымнан, кейде ағаштан тұрғын үйдің қарсы ал-дына киіз үй тәріздес етіп жасалған. Оның қабырғасы көбінесе дөңгелектеніп, төбесі конус сияқты болып келеді. Төбесінде жарық түсетін, түтін шығатын тесік қолданылады. Оған қыстыгүні шаңырақ қойып, үстіне киіз жабады. Ағаштан көбінесе 5 не 6 бұрышты етіп, қабырғасы дөңгелекке ұқсата жасалады. Еттікте қыстыгүні ет сақталса, жазда ол ас үй есебінде пайдаланылады. Еттікті «шошала» не «тошала» деп те атайды. Еттік қазір 4 бұрышты етіп салынады және Қазақстанның барлық жерінде кездеседі.