малма
зат. Үлкен ыдысқа құйып тері илейтін ашыған и. Малманы езген құртқа, қатық сары суына, айран-қатыққа, ұн немесе дәннен жасаған кежеге жылы тұзды су араластырып, ашыту жолымен әзірлейді. Бірнеше тәулік тұрған соң қоспа быжып ашиды. Жылы сумен жуылған теріні шелекке немесе күбіге құйылған малмаға бірнеше күн бойы салып қояды. Малмада иі қанған теріні сабынды сумен жуып, қоңыр салқын кезде ауада кептіреді де, талқыға салып, ирек ағашпен уқалап, жұмсартып, бояйды.