қыз ойнақ
Қазақтың ұлттық ойын-сауығы. Думанды бойжеткен қыздар ата-анасы мен ауыл ақсақалдарынан рұқсат алып өткізеді. «Қыз ойнақта» ұлттық ойындардың көптеген түрлерімен бірге «Кемпір мен шал», «Бүркіт пен қоян», «Қасқыр мен түлкі» тәрізді халықтың ойындары ойналады. «Қыз ойнақ» көбіне ши тарту, жүн сабау, киіз басу асарында (абыройлы жеңгенің отауында, беделді қыздың өз үйінде) жасалады. «Қыз ойнақ» 2—3 күнге, кейде әр қыздың ауылында кезек ойнау арқылы бір айға дейін созылады. Ауыл ағалары думанның тәртіпті әрі көңілді өтуін қадағалайтын болған. Қыздың ұзатылар алдында ауыл жастарымен қоштасуы ретінде өткізілетін сауық кеші де «Қыз ойнақ» деп аталады.