қынаменде
зат. этногр. Күйеу жігіттің қалыңдық отауына немесе қыз жеңгесінің үйіне жолдастарымен алғаш келуін қарсы алу кеші. «Қынамендеге» қатысушы қыз-келіншектер қызыл-жасыл киініп тырнақтарын бояйтын болған. Арабтың қына (қызыл-жасыл) деген сөзімен аталған болса керек. «Қынаменде» кеші қыз абыройының тазалығын білдіру үшін қалыңдықпен бірге болған күннің ертеңінде өткізіледі. Ән, күй, би қатар жүргізілетіндіктен, «қынаменде» жас жұбайлардың шаттық кешіне, жастардың махаббат мұратына жету символына айналған. Сауықта қазақтың ұлттық ойындарының бәрі де ойналады.