Агностицизм
Агностицизм (гр. аgnostos – біліп болмайтын, белгісіз) – болмысты тану, дербес ақиқатқа жету мүмкін емес дейтін тұжырымға негізделген философиялық ілім. Агностицизм жалпы алғанда танымды жоққа шығармайды. Ол танымның өзі туралы емес, оның мүмкіндігін, шектеулі екендігін, нақты дүниеге қатысын анықтайтын көзқарас. Басқаша айтқанда, агностицизм тәжірибенің сыртында қалатын обьектілерді танып білуге болмайды деп есептейді. Бұл терминді ағылшын жаратылыстанушысы Т. Гексли енгізген (1869 ж.).Ертедегі грек философиясында скептицизм (Пиррон) түрінде пайда болып, агностицизм өзінің классикалық формасын Д. Юм мен И. Кант философиясында тапты. Кантта ол "өзіндік зат" ("вещь в себе") деген тұжырымдама арқылы айтылған.
Агностицизмнің бір түріне иероглифтер теориясы жатады. Сол сияқты қазіргі заман философиясында неопозитивизм, экзистенциализм және басқа ағымдардың өкілдері де дүниені және адамды танып білуге болмайтындығын дәлелдеуге тырысады.