Альтруизм
Альтруизм (фр. аltruisme, лат. alter – басқа) – басқаның мүдделері үшін өзімшілдікті тежеп, оған жанқиярлықпен қызмет етуге дайындықты білдіретін ізгілік принцип, басқаларға риясыз, пайда іздемей (тілемей) шын, таза көңілмен көмектесу, қол ұшын беру, жақсылық жасау. Ғылыми қолданысқа альтруизмді эгоизмге (өзімшілдікке, өзімдік "Мен"-ге) қарсы ұғым ретінде француз философы О. Конт енгізген: ол "басқалар үшін өмір сүр" деген принципті тұжырымдады, ұсынды.Альтруизмнің адамгершілік алтын ережесі "өзіңе не тілесең, басқаға да соны тіле!" Альтруизмнің таза көрінісіне аналық махаббат жатады . Қазақтың дәстұрлі мәдениетінде альтруизм кісілік қасиеттермен, басқаға деген жылы көңіл – күймен, сұхбатшылдықпен, т.б. анықталады. Шынайы альтруизм - өмір ләззаттарынан бас тарту да, аскетшілдік пен тақуашылдық та емес. Қазіргі әлемдік мәдениеттегі бейбітшілдік, келісімдік, күш көрсетпеу, әмбебаптылық пен жалпы ғаламдық (жаһандық) басымдықтар (приоритеттер) идеялары альтруизмнің жаңа қырларын айқындайды.