Бейнелеу
Бейнелеу – гносеологияда (таным туралы ілімде) материалистік дәстүрге тән, сипатты фундаментальды, іргелі категория. Ол материалдық объектілердің басқа объектілермен өзара әрекет үдерісінде (процесінде) оларға (м.о.) әсер еткен құбылыстардың кейбір ерекшеліктері мен белгілерін өздерінің (матер. объект) өзгерістерінде қайта өндіру қабілетін білдіреді, сипаттайды.Бейнелеудің типі, мазмұны және формасы бейнелейтін объектілердің жүйелі-құрылымдық ұйымдасуының деңгейі және ерекшеліктерімен, сол сияқты олардың бейнеленетін құбылыстармен өзара әрекет амалымен (тәсілімен) анықталады. Өзара әрекеттен тыс және тәуелсіз бейнелеу болмайды. Бейнелеу үдерісінің нәтижесі бейнелейтін объектінің ішкі күй-жайында және оның сыртқы реакцияларында көрінеді.
Бейнелеудің механикалық, физикалық, химиялық және биологиялық түрлері бар. Бейнелеудің нәтижелері ("іздері") мен бейнеленетін (әсер ететін) объектілердің арақатынасы изоморфизм және гомоморфизм түрінде көрінуі мүмкін (тиісті терминдерді қараңыз).