Брахман
Брахман (брахманизм) - көнеүнділік діни мәтіндерде (текстерде) және соларға негізделген философиялық ілімдерде жоғары шындық (высшая реальность), абсолют, барлық бардың қайнар көзі дегенді білдіреді. Сонымен бірге бұл термин (ұғым) абыз, Құдай (Брахма), субстанция мағынасын да береді.Ведаларға (көне діни-философиялық жинақтарға) философиялық түсініктер беретін Упанишадтар "брахманды" шектелген және өзгерісте болатын әлемнің мәңгілік, атаусыз, өзгермейтін, шексіз, кезбе (вездесущий) рухани қайнар көзі ретінде анықтайды. Брахман уақыттан және кеңістіктен тыс, себепті-салдарлы байланыстардан тыс болады; ол көрінетін (феноменалдық) әлемнен тыс орналасқан және дағдылы санамен аңғарылмайды.
Брахманизм – брахманның әртүрлі концепцияларын жақтайтын, қолдайтын діни-философиялық жүйе (веданта мектептері, т.б.). Бұл жүйенің мектептерінде о дүниемен салыстырғанда адам өмірінің өткінші екендігі және оның мәнсіздігі туралы идеялар басты орын алған. Адамның о дүниедегі тағдыры оның бұл дүниелік ғұмырындағы адамгершілік іс-әрекеттеріне байланысты.