Логика
Логика (гр. logos- сөз, ұғым, ой, пікір, ілім )- дұрыс ойлаудың (пікірдің), білімді көбейтудің және оның ақиқаттылығы жағдайларының формалары (құрылымдары), заңдары және принциптері туралы кешенді ғылым. Диалектикалық және формальды логикадан тұрады.Диалектикалық логика ұғымдық (ұғымдар) жүйесінің қалыптасуы мен генезисін (шығу тегін) және тарихилық, ақиқаттың нақтылығы, абстрактылық пен нақтылықтың бірлігі, құбылыс және мән, мазмұн және форма, т.с.с. принциптерге сәйкес шындықты (реальность) дәйекті танып білуге ұмтылған (бағытталған) ойлаудың заңдылықтарын зерттейді. Диалектикалық логиканың әдіс ретінде сыни функциясы объективтік шындыққа үйлеспейтін гносеологиялық құрылымдарды «бракқа» (жарамсыздыққа) шығаруда көрініс табады, яғни объективтік шындыққа сәйкес келмейтін танымдық құрылымдарды жоққа шығарады, мойындамайды.
Формальды логика- ойлаудың (пікірдің) формалары (логикалық сүлбалары), оларды жүйелеу және дұрыс формаларын (логикалық заңдарды) іріктеу шарттары туралы ғылым. Логиканың негізгі міндеттерінің бірі- пікірлердің дұрыс тәсілдерін (жолдарын), яғни ойлаудың нәтижелерін тілмен білдірудің (жеткізудің) жалпы маңызды рационалды формаларын жүйелі формализациялау және каталогизациялау (тізімдеу), сонымен қатар пікірлер бағынатын заңдар мен ережелерді табу.