Модернизм
Модернизм, постмодернизм (фр. moderne- ең жаңа, қазіргі)- қазіргі заман философиясындағы ағым. Жалпы «модерн» ұғымы Еуропада ХҮІІ ғ. басталған ғылыми, діни, философиялық эволюция процесін түсінуге тырысқан жаңа заманның (уақыттың) ойлауын білдіреді. Тар мағынада «модернизм»- ХІХ ғ. аяғы мен ХХ ғ. басындағы көркем- әдеби ағым.Постмодернизм модернизмге реакцияны білдіреді және басында өнердің теориясы және әдеби бағыт ретінде қалыптасты. Сәулетші және өнер теоретигі Ч.Дженкс постмодерн ұғымын архитектураға қолданды. Оның ойынша, қоғамға тән көңіл- күйлер мен мәнерлердің плюралистігі (көптүрлілігі) сәулет өнерінде де өз көрінісін, орнын табуы керек. Осы ұғым кейін философияға да көшті. Француз философы Ж.Лиотардың «Постмодернизм тағдыры» еңбегінің негізінде постмодернизм термин статусына, дәрежесіне ие болды. Бұл ағым бұрынғы монизм философиясын (бір шындықты, бір ақиқатты мойындау), ондағы көзқарастардың, мәдени- әлеуметтік, моральдік дәстүрлер мен құндылықтардың сыңар жақтылығын сынға алады (дүние, ақиқат тіл, тарих, білім, адам т.б. туралы). Оның орнына табиғат пен қоғамдағы көптік, сантүрлілік идеясын жақтайды.
Постмодернизмнің жетекші өкілдері Р.Барт, Ж.Батай, Ж.Бодрийар, Ж.Делез, Ж.Деррида, Ф.Гваттари, Ж.Лиотар, М.Фуко және басқалар болып табылады. Олар өз шығармаларында көп жаңа ойлар, пікірлер және сол сияқты терминдер, ұғымдарды ұсынды (гипершындық, гипермәтін, деконструкция, контекстуализм және т.б.).