Нирвана
Нирвана (санскр., пали – ниббана – сөзбе сөз (буквально) «тіршілік етуді тоқтату», «өшу», «сөну») – үнді діни-философиялық ойының негізгі категорияларының бірі. Күнделікті азап-қасіретке толы бақытсыз болмыстан арылып, карма заңының негізінде қайта туылудан құтылып, сананың өшуі, тұлғаның ерекше күйге түсуі. Нирвана «мұхит сияқты терең, мұзарт сияқты биік, бал сияқты тәтті» делінеді. Оған жетудің жолы ауыр, ерекше жаттығулар, сол сияқты табандылық, төзімділік керек.Нирвана өмірдің жоқтығы емес, керісінше тұлға тіршілігінің айырықша түрі мен тәсілі. Толық нирвана жағдайында түсініктер де, сана да, жігер де жоқ, ол зұлымдық пен құмарлықтардың тынышталуы, сезінбеудің толық дәрежесіне жету.
Бұл термин буддизмде пайда болды. Ол ілім бойынша, нирвана кез келген болмыстың соңғы (ақырғы) ізгі мақсаты және оның (болмыстың) жоғары деңгейі болады. Буддалық ілімнің әртүрлі концепциялары жасалды.