Фальсификация
Фальсификация (лат.falsus – жалған, өтірік +facere – істеу, жасау) – австро – британдық философ К.Р.Поппер ұсынған принцип. Ол логикалық позитивизмнің верификация (эмпириялық тексеру) принципіне қарама – қарсы кез келген пайымдаудың принципиальды жоққа шығарылатындығын ұсынды, осыны фальсификация принципі деп атайды. Түптеп келгенде бұл пікір кез келген ғылымның гипотетикалық сипаты мен қателерге ұшырағыштығы бар деген қағидадан, яғни фаллибилизмнен туады және ғылымда өзгерілмейтін мәңгілік теориялар, концепциялар болмайтынды меңзейді (егер олар ешқандай өзгерілмесе, көптеген жаңа теориялар дүниеге келмесе – ғылымда даму жоқ).Фальсификация принципі бойынша, эксперименталдық мағлұматтарға сәйкестігін эмпириялық тексеру немесе ғылыми қауымдастықта қабылданған іргелі теорияларға сәйкестігін теориялық тексеру арқылы тиісті гипотезаның жалғандығы анықталады. Бұл принцип ғылым мен философияны ажыратудың критерийі болады.