Хаос
Хаос (гр.chaos – үңірейген, тұңғыйық, қараңғы) – 1)грек мифологиясында жерасты патшалығының қараңғы және шексіз кеңістікті білдіретін ұғым, әлемді, дүниені жаратудан бұрынғы алғашқы, бірінші түнек (қараңғылық); 2)кәдімгі әдеттегі ұғым бойынша шеткі тәртіпсіздік, ретсіздік, былық, ығы-жығы, бей-берекет, ұйқы-тұйқы; жүйелілік, қисындық, саралық жоқ бірдеме.Хаос ұғымы Аристотель мен Платон философияларында бар, бірақ біраз айырмашылық кездеседі. Антикалық дүниетанымға тән хаосты барлық заттардың пайда болуының алдындағы тәртіпке салынбаған күй ретіндегі ұғымды кейін ортағасырлық қабылдады. Айта кететін жәйт, грек мифологиясын физикалық (шексіз кеңістік ретінде) интерпретация философияның қалыптасуына әкелді, бұл өз ретінде әлемнің пайда болуын түсіндірудің алғашқы әрекеті болған хаостың философиялық, ғылыми түсінігін жасады. Ал мифтерді теологиялық (діни) түсіндіру дін ілімі концепцияларының қалыптасуын қолдады. Қазіргі заман философиясы мен ғылымында хаос ұғымы синергетикада кең қолданылады. (қар.:синергетика).