Чарвака–локаята
Чарвака – локаята (санскр. локаята – «аймақ, ел, кеңістік, әлем, жер, өмір», ал көпшілік түрде – «адамдар, халық, адамзат» дегенді білдіреді; «чарвака» терминінің шығуы туралы әртүрлі пікірлер бар, қабылданған бір көзқарас жоқ) – көне үнді философиясында материалистік позицияда тұрған бағыт деп саналады. Ол о дүниелік өмірді, қасиетті жазуларды (ведаларды) және жанның мәңгілігін жоққа шығарды. Білімнің жалғыз көзі деп сезімдік танымды - тікелей қабылдауды мойындады. Чарваканың ілімі бойынша, әлем (дүние) табиғи жолмен, сыртқы күштердің араласуынсыз пайда болды. Барлық бардың (тірліктің) негізін төрт элемент- жер, су, от, және ауа құрайды. Өмірдің күрделі формалары қарапайымдардан шығады. Сана материалдық элементтердің үйлесуі (тіркесі) болады. Адам өмірінің мақсаты – осы дүниеде рақатқа бөлініп, азап – қайғыдан арылуға ұмтылу. Жалпы алғанда чарвака – локаята ертедегі Үндінің индуистік және буддистік философиялық – діни мектептерге оппозицияда болып, дәстүрлі дүниетанымның жалпылай қабылданған қағидасы – карма доктринасын жоққа шығарады.