Эсхатология
Эсхатология (гр. еschatos - ақырғы, соңғы+logos - сөз, ілім) – әлем мен адамның ақырғы тағдырлары туралы діни ілім. Әсіресе бұл иудаизм мен христиандыққа тән: дүниенің ақыры, өлгендерді тірілту, Жазалау күні және т.с.с. туралы айтылады. Осыларға ұқсас көзқарастар ислам мен зороастризмде, сол сияқты шығыстық өркениеттердегі діндерде де орын алған.Уақыт пен тарих тұрғысынан қарастыру ерекшеліктеріне байланысты эсхатологияның екі түрін бөлуге болады. «Мифологиялық» эсхатологияда (бұл ат ғарыш ( космос - тәртіпке келтірілген әлем) пен хаостың арасындағы мәңгілік күреспен байланысты) тарих әлемнің дүркін-дүркін пайда болуы мен күйреуінің циклдік процесі ретінде түсіндіріледі. Ал «тарихи» түрі мифтерге емес, адамзаттың дәйекті даму контекстіде шешуші және іргелі деп қарастырылатын тарихи бекітілген оқиғаларға негізделеді.
Сонымен қатар эсхатологияның индивидуалды және дүние жүзілік түрлері туралы да айтылады. Бірінші жағдайда жеке адамның өлгеннен соң «о дүниедегі» болмысы туралы айтылса, екіншісінде космостың және тарихтың мақсаты, олардың ақыры және бұл ақырдан соң не болады туралы көзқарастар қозғалады.