кеден ережелерінің бұзылуы туралы хаттама
Кеден органының тиісті лауазымды тұлғасының кеден ережелерінің бұзылуы байқалған әр жағдай тура­лы белгіленген үлгі бойынша жасайтын хаттамасы. КЕБ туралы хаттамада мыналар көрсетіледі: оның жасалу күні мен орны; хаттаманы жасаған лауазымды тұлғаның лауазымы, аты-жөні; істі қарауға қажетті КЕБ үшін жауапкершілікке тартылатын адам туралы мәліметтер; бұзылу болған орын, уақыты және мәнісі; кеден ережелерін бұзғаны үшін жауапкершілікті қарасты­ратын бап; куәлардың аты-жөні мен мекенжайы; жауапкершілікке тартылатын адамның түсініктемесі; тартып алынған тауар­лар, көлік құралдары, құжаттар мен өзге заттар туралы мәлімет­тер, істі шешуге қажетті басқа да мәліметтер. Хаттамаға оны жасаған лауазымды адам, сондай-ақ кеден ережелерін бұзғаны үшін жауапкершілікке тартылған адам қолдарын қояды. Куәлар болған жағдайда олар да хаттамаға өз қолдарын қояды. Кеден ережелерін бұзғаны үшін жауапқа тартылатын адам хаттамаға қол қоюдан бас тартқан кезде бұл туралы хаттамаға жазылады. Кеден ережелерін бұзғаны үшін жауапкершілікке тартылатын адамдар хаттама мазмұны бойынша түсініктеме беріп, ес­керту жасауға, сондай-ақ, хаттамаға қол қоймау себебін баяндауға құқылы. Түсініктер мен ескертпелер, сондай-ақ, жауап­кершілікке тартылған адамның өз қолымен жазып айтқан хатта­маға қол қоймау себептері хаттамаға қоса тіркеледі. Хаттама жасалған кезде кеден ережелерін бұзғаны үшін жауапкершілікке тартылатын адамға оның құқықтары туралы түсіндіріліп, бұл туралы хаттамада белгі қойылады. Хаттама тартып алынған тауарлар, көлік құралдары, құжаттар мен өзге заттар өз қызметі аймағында кеден ережелерінің бұзылуы байқалған кеден органына жеткізіледі. Хаттама көшірмесі кеден ережелерін бұзғаны үшін жауапкершілікке тартылатын адамға қолхат алу арқылы тапсырылады немесе жіберіледі.