кеден брокері
Тауарларды кеден арқылы өткізілу барысында алып жүру бойынша көрсетілетін іскерлік қызметтердің кешенін жүзеге асыратын қазақстандық заңды тұлға. Қазақстан Республикасының заңнамасына сәйкес құрылған, кеден брокері ретіндегі қызметті жүзеге асыру құқығына уәкілетті органның лицензиясын алған заңды тұлға, Қазақстан Республикасының заңнамасына сәйкес кеден брокері (делдалы) бола алады.Кеден брокері өз атынан кедендік ресімдеу бойынша кез келген амалдарды жасауға және өз есебінен және өкілінің тапсырмасымен кеден ісі саласында басқа да делдалдық қызметтерді орындауға құқылы.
Лицензияға енгізілмейтін, лицензия алуға арналған өтініште көрсетілген кеден брокері туралы мәліметтер өзгерген жағдайда, кеден брокері өзгерістер болған кезден бастап бір ай мерзімде бұл туралы уәкілетті органды жазбаша хабардар етуге міндетті. Кеден брокерінің лицензияда көрсетілген атауы, тұрған орны өзгерген жағдайда, ол бір айдың ішінде көрсетілген мәліметтерді растайтын тиісті құжаттарды қоса тіркей отырып, лицензияны қайта ресімдеу туралы өтініш беруге міндетті.
Уәкілетті органкеден брокері тиісті жазбаша өтініш берген күннен бастап он күннің ішінде белгіленген тәртіппен жаңа лицензия беру арқылы лицензияны қайта ресімдейді. Кеден брокері лицензияда көрсетілген шектеулі қызмет саласын кеңейту туралы шешім қабылдаған жағдайда, жаңа лицензияны алудың белгіленген тәртібіне сәйкес оны алу қажет. Бұрын берілген лицензияның қолданылуы жаңа лицензия берілген кезден бастап тоқтатылады.
Лицензия жоғалған жағдайда кеден брокерінің өтініш берген күннен бастап он күн ішінде дубликат алуға құқығы бар. Дубликат бергені үшін Қазақстан Республикасының салық заңнамасында белгіленген тәртіппен және мөлшерде жекелеген қызмет түрлерімен айналысу құқығы үшін лицензиялық алым төленеді. Кеден органдарының кеден брокері ретіндегі қызметті лицензиялауға байланысты шешімдеріне Қазақстан Республикасының заңнамасында белгіленген тәртіппен шағым жасалына алады. Кеден брокері мен өкілдік беруші тұлғалардың арасындағы қатынастар лицензияның қолданылуы тоқтатылған, одан айырған және тоқтатыла тұрған жағдайда Қазақстан Республикасының заңнамасымен реттеледі.