еңбек
IЕңбек келісімі. р е с м и. Жұмыс беруші мен жұмысқа тұрушы арасында жасалған келісімшарт. Е ң б е к к е л і с і м і н д е төленетін еңбекақы көлемі көрсетіледі (Қ. Қадыржанов, Іс қағаз., 79). Еңбек өтілі. жаңа. Еңбек еткен жылдарының жиынтық саны (Бекіт. термин., 30). Еңбек сауды. Еңбек етіп, тіршілік етті; еңбегімен күн көрді. Төремұраттың топшылауынша, асып-тасып жатпағандарымен е ң б е к с а у ғ а н біртоға қоңыр үй (Ө. Ахмет, Қарқаралы., 10). Еңбек сауған. Еңбек еткен, еңбекпен күн көрген. Жаңылдың әке-шеше сі Жазықбай мен Күлғайша өзі сияқты құдай деген, е ң б е к с а у ғ а н момын адамдар екен (Т. Мәмесейіт, Таудан., 98). Кешегі кеңестік кезеңде осы бір е ң б е к с а у ғ а н қарапайым жандардың өзі табан ақы, маңдай терінің де рахатын сезінбей, кіріптарлық күй кешті (Ана тілі, 24-30. 09.2009, 9).
II
Еңбегі қатты. Сәбидің еңбегі (төбесіндегі былқылдап тұрған жері) толық қатайды, бекіді. Е ң б е г і қ а т п а ғ а н сәбидің басына жұқа матадан тігілген жеңіл баскиім, ал е ң б е г і қ а т қ а н сәбиге қалыңдау баскиім кигізеді (Қаз. этнография., 2, 55).