шұбар
Шұбар кесіртке. зоол. Құмды жерлерде мекендейтін, денесінің ұзындығы 5-6 см, екі бүйірінде қара дақтары бар кесіртке. Ш ұ б а р к е с і р т к е тіршілігі аз зерттелген, өте сирек кездеседі (ҚҰЭ, 9, 569). Шұбар көкек. зоол. Басында айдары бар сасықкөкек түсіне қарай кейде осылай да аталады. Үні тарғыл-тарғыл шығып, қарға да қарқылдап қояды, ш ұ б а р к ө к е к сұңқылдайды (Ш.Мұртазаев, Интернат., 14). Шұбар күзен. Күзеннің тұрқы ұзын, өзі шұбар түрі. Ш ұ б а р к ү з е н табиғатта сирек кедесетін аңның бірі (Соц. Қаз., 20. 03. 1982, 3). Ш ұ б а р к ү з е н әр түрлі кеміргіштерді қорек етеді (Бұл да). Сүтқоректі жануарлардан Қазақстанның Қызыл кітабына қарақұйрық, ақтөс сусар, ш ұ б а р к ү з е н, сабаншы, кәмшат тіркелген (Ана тілі, 03. 05. 2012, 11). Шұбар тоқылдақ. Тоқылдақтың ең кіші, шұбар түсті түрі. Қазақстанда тоқылдақтың 8 түрі бар. Солардың ең кішісі – ш ұ б а р т о қ ы л д а қ (ҚҰЭ, 8, 421). Шұбар шабақ. ихтиол. Шұбар түсті уақ балық. Онда (Балқашта) алабұға, шармай және ш ұ б а р ш а б а қ тіршілік етті (Қаз. әдеб., 16. 12. 1988, 2). Айдын шалқар көлдің алабұғасы, шармайы мен ш ұ б а р ш а б а ғ ы қандай еді (Қаз. әдеб., 08. 10.1993, 13).