қисықтөс
зат. Қос өркешті түйе мен қоспақтың арасынан шыққан түйе тұқымы. Түйенің төсі қисық, тегі нашар, азғын түрі; күлгешөгер. Әдетте қоспақ пен айыр түйенің арасынан тәуір тұқым тумайды. Жазатайым туа қалса жүні тықыр, күші жоқ, суыққа осал болып келеді де, қазақ түйешілері оны жарбай, соқпақ, қылағай, кірісті қоспақ, қ и с ы қ т ө с, күлгешөгер деп жер-жебіріне жетіп кемсіте атап, тезірек тұқымын құртуға тырысады (А.Сейдімбеков, Серпер, 87). Қ и с ы қ т ө с – буыршынның інгенге не буыршынның аруанаға немесе лөктің інгенге шағылысуынан пайда болған түйе (Қазақша мал атау., 52). Бұлар төс кемістігіне қарай – қ и с ы қ т ө с, тоңғақтығына қарай – күлгешөгер атанған (Қаз. этнография., 3, 270).